Viðgjørdu trygdarstøðuna í Norðurhøvum

03.09.2020 - 13:10

Innlendis›Politikkur

- Vit staðfesta størri, hernaðarligt virksemi úr Russlandi, sigur Jeppe Kofod, uttanríkisráðharri, sum er á vitjan í Føroyum

Jón Brian Hvidtfeldt

Aktivera javascript

Eftir fundin skipaðu Jenis av Rana, landsstýrismaður í uttanríkismálum, og Jeppe Kofod, uttanríkisráðharri, fyri tíðindafundi í Tinganesi

Mynd: Bjarni Árting Rubeksen

Trygdarstøðan í Norðurhøvum var á dagsskrá fyri fundin millum danska uttanríkisráðharran og føroyska landsstýrismannin í uttanríkismálum.

- Vit uppliva størri, hernaðarligt virksemi úr Russlandi. Tað er geopolitiski veruleikin, vit liva í, sigur Jeppe Kofod, uttanríkisráðharri.

Russland er meira aktivt á hernaðarliga økinum. Tað staðfesti Jeppe Kofod á tíðindafundi fyrrapartin.

Og tað gjørdi uttanríkisráðharrin eisini so seint sum týsdagin, tá hann alment fordømdi, at eitt russiskt SU-27 stríðsflogfar fleyg inn í danskt loftrúm í Eystrasalti. Kofod upplýsti tá, at støðan kundi als ikki góðtakast, og donsk F16-stríðsflogfør vórðu send eftir russsiska flogfarinum.

Eisini á okkara leiðum

Fyrr í ár - síðst í februar og tíðliga í mars - hendi nakað líknandi her um okkara leiðir.

Tríggjar ferðir flugu tvey serútgjørd, russisk stríðsflogfør av slagnum TU-160 beint gjøgnum føroyskt loftrúm.

Flogførini vórðu sædd av norsku herstøðini í Bodø í Norra, har tvey F16-flogfør vórðu send eftir teimum. Og tey komu suður í bretskt loftrúm, vórðu tey møtt av tveimum Typhoon-stríðsflogførum hjá bretska flogvápninum.

Hetta er váttað í fleiri altjóða miðlum.

Vildi ikki tosa um tilburðin

Eisini vísa mátingar yvir farleiðirnar hjá russsiku flogførunum, at tey vóru í føroyskum loftrúmi.

Tí spurdu vit uttanríkisráðharran, um Danmark er ført fyri at ansa eftir føroyska loftrúminum, tá tílíkt kann fara fram, uttan nakra reaktión:

Jeppe Kofod vil gjarna tosa um tilburðin við Bornholm - men ikki um tilburðin yvir Føroyar fyrr í ár.

Hoyr samrøðu við Jeppe Kofod í útvarpstíðindunum.