Løgmaður: Kommunurnar skulu takast við

Tað er ein spurningur um temperament, um landsstýrið hevur bakkað fyri kommununum og Sev, nú arbeitt verður við at taka netið frá Sev.

Tað sigur Bárður á Steig Nielsen, løgmaður, um fundin, hann hevði við Kommunufelagið og Sev hósdagin.

Ætlanin var alla tíðina at taka kommunurnar og Sev við í arbeiðið, sum embætisfólk hjá landsstýrismanninum í orkumálum hava fyrireikað, sigur hann.

Embætisfólkini fóru longu í februar undir at fyrireika uppskotið um, hvussu netið og framleiðslan hjá Sev skulu skiljast sundur, men Kommunufelagið sigur, at tað frætti ikki um hetta arbeiðið fyrr enn í juli.