Gera berghol til Vestmanna fyrst

Trygdin kemur fram um ferðslutíttleikan.

Tí skal berghol gerast til Vestmanna fyrst, áðrenn berghol verður gjørt í Gøtudali, sigur Jørgen Niclasen, landsstýrismaður í samferðslumálum.

Fimm milliónir krónur eru settar av í 2022 og 15 millionir í 2023 til farleiðina til Vestmanna. Sambært búskaparfrágreiðingini verða pengar eisini játtaðir árini 2024-2027. 

Skotið er upp at játta 368 mió. kr. árini 2022-2027. 

Hetta er beint ímóti samferðsluætlanini hjá Landsverki. Í henni verður mælt til at gera Gøtudalstunnilin frá 2022 til 2025.

Vestmannatunnil í 2030

Í samferðsluætlanini stendur farleiðin til Vestmanna ikki á skránni fyrr enn í 2030.

Sambært samferðsluætlanini verður ikki mett at vera neyðugt at broyta farleiðina til Vestmanna við verandi ferðslu og framkomuleika.

Men annars eru, sambært Landsverki, tríggir møguleikar, berghol úr Kvívík, berghol frá Leynavatni og brúgv úr Oyrargjógv.