Nú kemur føroyskt á Google Translate

Nú kemur føroyska málið eisini á Google Translate.

Mentamálaráðið ætlar at hækka játtanina til orðabókagerð 500.000 krónur.

Peningurin skal brúkast til eina verkætlan at týða 200.000 enskar setningar til føroyskt, so føroyskt verður ein partur av Google Translate.

Jenis av Rana, landsstýrismaður, væntar, at tann hálva milliónin verður nóg mikið til at gera arbeiðið liðugt.

Arbeiðið, sum skal gerast í Føroyum, er longu byrjað. Sprotin stendur fyri at týða setningarnar, og nú skulu forrit og annað gerast.

Samband er fingið í lag við eitt útlendskt felag um tað arbeiðið.