Eysturoyartunnilin kostar skattgjaldaranum 900.000 kr. um vikuna

Um onkur munagóð loysn ikki verður funnin, sum kann økja ferðsluna í Eysturoyartunlinum, so fer tunnilin at kosta føroyska skattgjaldaranum 47 milliónir krónur hetta fyrsta árið, hann hevur verið opin.

Tað sigur Teitur Samuelsen, stjóri.

Við verandi ferðslu í tunlinum, so mangla 900.000 krónur hvørja vikua á botnlinjuni hjá tunnilsfelagnum, um tað skal megna svara hvørjum sítt, váttar stjórin.

Miðalferðslan vekstur spakuliga

Miðalferðslan í Eysturoyartunlinum veksur støðugt, men spakuliga, vísa hagtøl á heimasíðuni tunnil.fo.

September er besti mánaður higartil. Tá koyrdu 4.755 bilar gjøgnum tunnilin - tað eru 255 bilar fleiri samanborið við august í ár.

Landið hevur tryggjað felagnum, at inntøkurnar vera tær, sum svara til stívliga 6.000 bilar um dagin.

Ongar ætlanir um at lækka prísin

Hóast tunnilsfelagið manglar 900.000 krónur um vikuna á botnlinjuni, fyri at fáa raksturin at mala runt, so hevur felagið ongar ætlanir um at lækka prísin at koyra gjøgnum tunnilin, sigur Teitur Samuelsen. 

"Nei, tað liggur ikki í kortunum beint nú. Vit kunnu gott lækka prísin og fáa fleiri bilar at koyra, men vit fáa ikki fleiri pengar í kassan." 

"