Svartkjaftaskip vilja sleppa at landa uttanlands

Skip skulu sleppa at landa uttanlands, nú tey liggja í fleiri dagar og bíða eftir landingartørni í Føroyum.

Soleiðis ljóðar áheitan, sum Føroya Fiskimannafelag hevur sent Árna Skaale, landsstýrismanni í fiskivinnumálum.

Eitt teirra er nótaskipið Christian, sum í gjáramorgunin kom aftur av fiskiskapi við umleið 2.200 tonsum av svartkjafti.

Men í staðin fyri at seta kós móti Fuglafirði, har Havsbrún tekur móti svartkjafti, bleiv lagt at í Ánunum.

Og har fer skipið at liggja í nakrar dagar, tí góður fiskiskapur er, og fleiri skip eru um boðið. Tað hevur við sær, neyðugt er at bíða í fleiri dagar eftir landingartørni í Fuglafirði.

Hoyr Páll Rasmussen, skipara á Christiani, í útvarpstíðindunum.

Sambært §41 í lógini um sjófeingi kunnu fiskifør undir føroyskum flaggi landa og avreiða í mesta lagi 15 prosent av veiðuni fyri hvørt fiskaslag sær uttanlands.

Og tá Christian bara hevur eina kvotu upp á 10.000 tons av svartkjafti, ber ikki til at fara uttanlands at landa veiðina upp á 2.200 tons, uttan at fáa undantak frá landsstýrismanninum.