KT-serfrøðingur : Lítil vandi fyri, at teldusníkar leypa á Føroyar

Við innrásini í Ukraina, so fer heimurin fyri fyrstu ferð at uppliva eina samanseting av siðbundnari og talgildari krígsførslu.

Tað fer eisini á raka Danmark, sigur Peter Kruse, ein av stovnaranum av trygdarfyritøkuni, CSIS.

- Vit mugu vænta eina øking av slíkum álopum á tey lond, sum seta átøk í verk í móti Russlandi.

Kaj Heri Joensen, data-arkitektur og KT-trygdarserfrøðingur hjá Elektron, heldur tó ikki, at Føroyar eru eitt mál. 

Heldur ikki, nú nógv umrøddi radarin hevur gjørt Føroyar sjónligari enn áður.

Nógvar ukrainskir KT-ráðgevar

Ein trygdarvandi kann vera KT-ráðgevar, sum eru tengdir at føroyskum fyritøkum, sum eru partur av stríðnum í Ukraina. 

Talgildu Føroyar hava átta ukrainskar ráðgevar, sum hava verið við til at ment talgilda føroyska pallin.

Nikolaj Balle, stjóri fyri Talgildu Føroyar, sigur í stuttari viðmerking, at tey hava verið í samband við ukrainsku ráðgevarnar, og at teir eftir umstøðunum hava tað gott, og at nakrir teirra enn hava møguleika at røkja sítt arbeiði.

Hann leggur tó afturat, at í Talgildu Føroyum eru tey tilvitað um møguliga trygdarvandan, og tey hava umrøtt støðuna, og um ávís trygdartiltøk skulu setast í verk.