Landið rindar leingi fyri tunlar

Í ár má landið rinda umleið 50 milliónir krónur til partafelagið Eystur- og Sandoyartunlar.

Orsøkin er serliga, at prísurin er lækkaður, men tað koyra heldur ikki nóg nógvir bilar ígjøgnum Eysturoyartunnilin.

- Ferðslan er munandi hægri, enn hon var í fjør. Men inntøkurnar hækka ikki samsvarandi, tí prísurin hjá øllum akførum at koyra gjøgnum tunnilin er lækkaður nakað, sigur Teitur Samuelsen, stjóri í p/f Eystur- og Sandoyartunlar. 

Sambært stjóranum eru tølini ikki heilt liðug enn, og tí ber ikki til at siga við vissu, júst hvør endaligi prísurin hjá landinum verður í ár. 

Teitur Samuelsen

Caption: 

Teitur Samuelsen er stjóri í p/f Eystur- og Sandoyartunlar.

Sambært Teiti Samuelsen, var tað eitt politiskt ynski, sum hevur elvt til, at prísirnir í tunlunum eru lækkaðir. 

- Tað var eitt politiskt ynski um, at samfelagsliga nyttan hjá tunlunum hækkaði, og tað hevur so gingið út yvir prísin, sigur stjórin. 

Landið hevur bundið seg til at gjalda munin millum veruligu ferðsluna og ferðsluna, sum er kravd fyri, at felagið ikki hevur hall.

Í fjør mátti landið rinda felagnum 27 milliónir krónur fyri seinna hálvár, tí prísirnir lækkaðu. 27 milliónir krónur svara til góðar 148.000 krónur um dagin.

- Við núverandi prísstøði fer tað at ganga nakað av tíð, áðrenn verkætlanin fíggjar seg sjálva. Hetta er tó sjálvandi ætlanin, men tað er torført at siga júst nær, sigur Teitur Samuelsen.