Framvegis hált um alt landið

– Tað er hvítt og hált, og vit hava rættiliga stórar avbjóðingar í kavanum, sigur Árni Jacobsen, økisleiðari hjá Landsverki, ið ikki veit um so nógvan kava í fleiri áratíggju.

– Eg kann nevna, at allan vegin til Elduvíkar er kavin eina manshædd, og har sum tað er ringast, má kavablásari til, tí tað tekur ov langa tíð at rudda kavan við skuffu, sum tær stóru maskinurnar hava.

Hann sigur, at á Sandoynni er ikki koyrandi til Skarvanes, og heldur ikki er koyrandi til Gásadals, Norðadals, Tjørnuvíkar, oman til bygdina í Funningi og til Gjáar.

– Tað er trupult at rudda vegirnar til tær bygdir, sum enn eru avbyrgdar, men maskinurnar grava til klokkan 21, og fara so í gongd aftur í morginári, sigur Árni Jacobsen.

Landsverk kunnar og dagførir alla tíðina á heimasíðu síni, lv.fo.