– Bankin gongur ov nær

– Tað er ein hóttan ímóti fólkaræðinum, at fólk við álitisstørvum í politiskum flokkum skulu breiða út øll møgulig viðurskifti hjá maka, børnum, svigarbørnum og øðrum við, tí bankin skal brúka hesar upplýsingar fyri at tryggja seg ímóti hvítting av pengum.

Tað sigur Rúna Sivertsen, sum er næstforkvinna í landsnevndini hjá Sjálvstýri.

Fyri eini viku síðani fekk hon eitt bræv frá Betri banka, dagført 11. januar, har hon varð biðin um upplýsingar av ymiskum slagi um seg sjálva og onnur.

Eisini onnur, sum sita í leiðsluni í Sjálvstýri, hava fingið líknandi bræv, og talan er bara har um minst hálvthundrað fólk, sum Betri banki vil hava upplýsingar um.

– Tá ið eg fekk hetta brævið, hugsaði eg, at “her gongur markið”, og at hetta fari eg ikki at lata inn um míni børn, sigur Rúna Sivertsen.