Integratión kemur ikki av sær sjálvum

Hugnaløtan var á Biskupstorginum, har tað bar til at standa á skoytum ella fáa sær heitt kaka og bollar, og tey vóru ikki so fá, ið tóku av tí møguleikanum – bæði føroyingar og tilflytarar.

– Eg haldi, at tiltakið hevur eydnast væl, sigur Heini Ziska Dal, sum er við í integratiónsnevndini, hevur síðani 2006 verið giftur við Liezel úr Filipsoyggjum, og tí kennir hann nokk so nógv til júst integratión.

Daria Zellmer, sum er fødd og uppvaksin í Polandi, men síðani flutti til Colorado í USA, haðani hon flutti til Føroya, sigur tað ongantíð vera lætt at koma sum fremmandur til nakað nýtt.

– Men tað hjálpir væl at læra seg málið, og tá ið eg gjørdist mamma, kom eg at kenna fleiri fólk, og eisini hevur svigarfamiljan verið mær til stóra hjálp, sigur Daria Zellmer, sum býr og er gift í Klaksvík.

Bæði hon og Heini Ziska Dahl eru við í Integratiónsnevndini í Klaksvík. Nevndin hittist einaferð um mánaðin, har tey millum annað taka ymiskt upp, sum er aktuelt, og so verður eisini skipað fyri ymiskum tiltøkum, sum tí í dag.