Brúgvin er enn eins umráðandi

Í dag eru 50 ár síðani, at brúgvin við Streymin varð tikin í nýtslu.

Talan var um størstu byggiverkætlan í føroyskari søgu, og tá ið brúgvin stóð liðug, kostaði hon 13 milliónir krónur.

Um brúgvin varð bygd í dag, og støði einans var tikið í øktu inflatiónini seinstu 50 árini, hevði hon kostað 31,1 milliónir krónur at byggja (her er ikki lagt upp fyri øktum kostnaði fyri arbeiðsmegi, byggitilfar o.a.).

Tað var Atli Dam, táverandi løgmaður, sum klipti snórin tann 30. oktober í 1973, so koyrandi var ímillum Streymoynna og Eysturoynna.

Tað tók tvey ár og tveir mánaðir at byggja brúnna, sum er 220 metrar long, 9,5 metrar breið og 17 metrar høg. 

Í Sunda kommunu hátíðarhalda tey dagin við alskyns undirhaldi, millum annað ber til at síga oman av brúnni, at síggja framsýning um brúnna, postarenning og kl. 13 verður føðingardagssangur sungin fyri brúnni.

Hoyr samrøðu við Jógvan Kruse, borgarstjóra í Sunda kommunu, ovast í greinini.