- Eiga at broyta skipanina við klokkuni

Í fjør arbeiddi Bárður á Steig Nielsen, sum tá var løgmaður, við at gera eitt uppskot um at strika skipanina, har vit tvær ferðir um árið flyta klokkuna millum summar- og vetrartíð, men tað uppskotið kom ongantíð longri enn til hoyringar, áðrenn løgtingsval varð útskrivað, so uppskotið fall burtur, áðrenn tað nakrantíð kom í Løgtingið.

Nú situr Bárður á Steig Nielsen í andstøðu, men hann hevur kortini ikki slept vónini um, at Føroyar fara at gevast við at flyta klokkuna tvær ferðir um árið.

Føroyar hava skift millum summar- og vetrartíð síðan 1981. Í Íslandi hava tey ikki flutt klokkuna síðan 1968, og nú í ár gavst Grønland eisini við at flyta klokkuna. Grundgevingin hjá grønlendsku myndugleikunum er, at Grønland vil vera nærri evropeisku klokkutíðunum.