Hjálparfólkafelagið fegnast

Hjálparfólkafelagið tekur væl ímóti loysnini, Tórshavnar kommuna nú er komin við, at í minsta lagi 30 hjálparfólk í føstum starvi kunnu útbúgva seg sum námsfrøðingar, samstundis sum tey eru í starvi.

Men hinvegin heldur felagið, at av tí at tørvurin á hjálparfólkum framvegis er stórur, átti møguleikin at givið hjálparfólkum viðkomandi skeið, eisini at verið umhugsaður.

- Spurningurin er, um vit ikki heldur eiga at førleikamenna verandi hjálparfólk, heldur Sámal Hansen, formaður í Hjálparfólkafelagnum.

Formaðurin í Hjálparfólkafelagnum vísir á, at tað aðrastaðni finnast smærri útbúgvingar, ið kunnu betra førleikarnar hjá serliga hjálparfólkum, men at hetta ikki er ein møguleiki við verandi sáttmála.

Sámal Hansen sigur, at hóast nýggja útbúgvingartilboðið gevur 30 fleiri námsfrøðingar um hálvttriðja ár, so verður tørvurin á hjálparfólki einki minni fyri tað.
Hann vísir á, at síðstu mongu árini eru nógv fleiri hjálparfólk komin aftrat.