Framtak skal gera fleiri íløgur í smáar og miðalstórar fyritøkur

- Endamálið við hesum er, at vit serliga skulu gera íløgur í smáar og miðalstórar fyritøkur, sigur Ben Arabo, stjóri í Framtaki. 

Sambært uppskotinum, sum Høgni Hoydal, landsstýrismaður í uttanríkis og vinnumálum, hevur lagt fram, skulu 38 mió. kr. av láni  umleggjast til eginpening. Tær 38 milliónirnar eru tað sum er eftir, av láninum á 99 milliónir, sum landsstýrið gav í 1995, tá Framtaksgrunnur Føroya, nú Framtak, var stovnaður. Verður lánið lagt um, fær Framtak eina størri eginogn og harvið møguleika at gera fleiri størri íløgur. Ætlanin er at hetta serliga skal koma smáum og miðal stórum fyritøkum, teirra millum eisini nýstovnaðum fyritøkum, til góðar. 

Enn er ikki greitt nær uppskotið kemur til 1. viðgerð.