Smittuførar bakteriur staðfestar í Miðvági

Fríggjadagin sendi landslæknin eitt kunningarskriv út til foreldur og starvsfólk í Miðgarði, har kunnað var um bakteriuna stytt VTEC, sum elvir til leyst lív, kvalma, spýggju og febur.

Orsøkin til at landslæknin ávarar ímóti hesi bakteriuni er, at hon í nøkrum førum  eisini kann elva til nýrasjúku, sum er meira alvorlig.

Eitt barn á stovninum er higartil innlagt, og nøkur aftrat eru til observatión, sigur landslæknin, Lars Fodgaard Møller, við Kringvarpið í dag.

Hann leggur aftrat, at tilburðirnir higartil, eru isoleraðir til eina stovu á stovninum.

Bakterian kann koma frá skarni hjá bæði fólki og fæi, umframt dálkaðum matvørðum, og hon fer síðani frá hondum og í munnin. 

Landslæknin heitir á foreldur at børnum á Miðgarði at fara til lækna um tey fáa leyst lív, og vísa læknanum kunningarskrivið.

At vaska hendurnar ofta og væl er besta fyribyrgingin ímóti VTEC bakteriuni, leggur landslæknin aftrat.