Fagnaðurin fevnir allar íðkarar

Støkk vann fimleikafagnaðin, sum var í Norðulandshúsinum í Havn um vikuskiftið. 

Uppgávan hjá teimum fimm luttakandi feløgunum var at tulka evni, 'kongaríkið' og vísa úrslitið - og breiddina í felagnum -  við rørslum, ljósi, tónleiki og ikki minst hugflogi.

Hetta er seytjandu ferð, at fagnaðurin er á skránni, og breið semja er um, at tiltakið er so nógv annað enn ein kapping.

 - Her skulu øll sleppa við, eisini tey, sum ikki eru elitufimleikarar, sigur Jenny Petersen, sum hevur verið dómari til fagnaðin fleiri ferðir.

 - Hann samlar alt felagið, og tað er gott fyri felagsskapin, sigur Gunn Reginsdóttir Hermansen, forkvinna í Fimleikasambandinum og samskipari.

Fimm feløg og 400 íðkarar tóku lut í fimleikafagnaðinum í ár.