Farstøðin í Kastrup er latin uppaftur

Partar av Terminal 3 í floghavnini í Kastrup vórðu stongdir í morgun, men hava nú latið uppaftur.

Kunningarstjórin á flogvøllinum í Kastrup, Kenni Leth, segði fyri løtu síðani við Danmarks Radio, at ein kinesisk kvinna hevði krímlíknandi eyðkenni, eftir at hon var komin úr einum flogfari úr Kina, sum hevði millumlent í Helsinki.

Hann leggur tó dent á, at enn vita tey ikki, um tað hevur nakað við coronavirusið at gera.

Løgd inn á sjúkrahús

TV2 skrivar, at kvinnan er løgd inn á háisolatiónsdeildina á Hvidovre sjúkrahúsi, har hon nú verður kannað fyri coronavirus.

Partar av farstøðini vóru stongdir stutt fyri klokkan átta føroyska tíð. Stongdu økini eru síðani vaskað og reinsað, og TV2 skrivaði fyri løtu síðani, at terminal trý nú er opin sum vanligt aftur.

Sjónarváttar, sum TV2 hevur tosað við, siga, at nógv trygdarfólk komu á staðið, og tey vóru ílatin trygdardraktir, og avbyrgdu komuhøllina.