IS ætlar at leypa á Ísrael

Islamskur Statur boðar frá, at Ísrael verður næsta stóra málið fyri álopum frá felagskapinum.

Tað boðar talsmaðurin hjá felagskapinum, Abu Hamza al-Quraishi, frá á alnetinum.

Hann heitir á limirnar í felagskapinum um at skipa seg av nýggjum, og í størri mun søkja at málum í Ísrael.

Helt røðu í hálvan tíma

Røðan á netinum, sum er meira enn hálvan tíma til longdar, heitir beinleiðis at tey, sum vilja verja kalifatið, um at venda eyguni ímóti Jerusalem.

Og hann boðar eisini frá at talan verður um álop, sum higartil eru ósædd.

Franska tíðindastovan sigur seg ikki kunna siga, hvussu nógv skal leggjast í boðini, men at tað hevur týdning, at boðini eru løgd út á eina heimasíðu hjá IS. Islamskur Statur hevur fyrr tilnevnt eitt kalifat í Sýria og í Irak, men altjóða herdeildir hava bart ta ætlanina niður.

Bólkurin er framvegis virkin nógvastaðni, m.a. í Afrika, Asia og á Sinai-hálvoynni, við ísraelska markið, skriva Ritzau og AFP.