Smittaða kvinnan: Læknar hildu ongan vanda vera

Nú er staðfest, at ein føroyingur aftrat er smittaður við koronuvirusinum. Talan er um eina kvinnu, sum hevur verið í Norðuritalia, og hon er í løtuni avbyrgd heima við hús.

Tá kvinnan var komin heimaftur mikudagin, vendi hon sær til kommunulæknan. Læknin svaraði, at hon skuldi bera seg at sum vanligt, hóast hon júst var komin úr Norðuritalia, har nógvir tilburðir av COVID-19 eru staðfestir seinastu tíðina.

 >> SÍ EISINI Enn ein føroyingur fingið coronavirus

Kvinnan góðtók ikki svarið, og ringdi síðani til Læknavaktina, men fekk sama svar haðani. Kvinnan sigur, at læknavaktin vildi ikki kanna hana, hóast hon kendi sjúka.

Kvinnan vildi framvegis ikki góðtaka svarið frá læknunum, og í gjár vendi hon sær fyri triðju ferð til kommunulækna. Tá varð hon kannað, og í gjárkvøldið varð staðfest, at hon er smittað við COVID-19.

Landslæknin er farin at kanna, hvønn smittaða kvinnan hevur havt samband við, og síðani verður støða tikin til, um fólk skulu avbyrgjast.