Skulu ikki leggja hond á kistuna

Í hesum tíðum skulu vit ikki leggja hond á kistuna til jarðarferðir. Tað sigur fólkakirkjan í skrivi, sum er undirskrivað av Una Næs, dómprósti, og Jógvani Fríðrikssyni, bispi. 

Talan verður ikki um at avlýsa jarðarferðir, men tilmælið um, at vit ikki skulu vera fleiri enn 100 fólk á sama stað, ávirkar eisini jarðarferðir, siga bispur og dómpróstur.

Mæla frá at taka í hondina hjá avvarðandi

Umframt ikki leggja hond á kistuna, mæla teir eisini frá at taka í hondina á teimum avvarðandi, og kirkjan fer at nýta prentað ørk í staðin fyri sálmabøkur, eins og fólk skulu halda eina ávísa frástøðu.

Kirkjan sigur tó, at avvarðandi at sjúkum eru vælkomin at senda boð eftir presti til eitt nú samtalu, bírætting og andakt.

Tí hóast tilmæli um at vera varin í almenna rúminum, vil kirkjan vera saman við fólkinum í góðum eins og í avbjóðandi løtum, sigur bispur og dómpróstur.