Skulu venda sær til kommunulækna

Fólk, sum kenna seg sjúk, halda seg vera, ella hava verið í smittuvanda, skulu ikki venda sær til Klaksvíkar sjúkrahús, men heldur ringja til sín kommunulækna.

Tað minnir Alexandra á Dul, stjóri á Klaksvíkar sjúkrahúsi, á, nú tað er greitt, at ein kvinna, sum hevur fingið staðfest COVID-19 smittuna, er námsfrøðingur í Mylnuhúsinum í Klaksvík.

Kvinnan, sum fekk staðfest smittuna í gjárkvøldið, var til arbeiðis á dagstovninum týsdagin, og tí hevur Klaksvíkar kommuna nú sent øll starvsfólkini og børnini á dagstovninum til hús við áheitan um at halda seg heima.

Eisini foreldrini eru biðin um at fara í sjálvboðið sóttarhald.