Eingin álvarsliga sjúkur

Eingin av teimum trimum persónunum, sum í løtuni eru innløgd við Korona í Føroyum, hava tørv á intensivari viðgerð ella respiratori. 

Tað upplýsir Tummas í Garði, varastjóri við læknafakligari bakgrund í Sjúkrahúserki Føroya. 

Higartil hava færri enn tíggju fólk verið innløgd við Koronasjúkuni tilsamans, men enn hevur ikki verið neyðugt við intensivari viðgerð.

Tveir nýggir tilburðir av koronasmittuni eru staðfestir í Føroyum seinasta samdøgrið, og tilsamans 169 tilburðir eru staðfestir. 

Í alt 4065 fólk eru kannað fyri korona. 74 fólk eru vorðin frískt aftur, og 396 fólk eru í sóttarhaldi.