Óvist, hvussu verður við føroyaflúgvingini

Skandinaviska flogfelagið, SAS, helt tíðindafund seinnapartin, men einki varð sagt um flúgvingina til og úr Føroyum á tíðindafundinum.

Tað hevur heldur ikki borið til at fáa fatur á kunningardeildini hjá skandinaviska flogfelagnum síðani tíðindafundurin endaði umleið klokkan 17.

Landsstýrið hevur samskift við SAS um føroyaflúgvingina. Tað kom fram á tíðindafundi, sum landsstýrið helt á nátturða í kvøld.

– Kemur tað har til, at landsstýrið heldur, at SAS skal steðga við at flúgva til Føroya, so eru føroysku myndugleikarnir sinnaðir at syrgja fyri, at til ber at steðga hesi flúgving, segði løgmaður.