Sóttarhaldið ikki tikið í nóg stórum álvara

Tað er ein avbjóðing, at avbyrgja coronasmittuna í Føroyum, tí tað eru ikki øll, sum virða tað, at verða sett í sóttarhald, sigur Lars Fodgaard Møller, landslækni.

Heilsumálaráðið skrivar soleiðis á heimasíðuni:

– Eg kann tíverri bara staðfesta í mínum arbeiði seinastu vikurnar, at tað eru fleiri, sum ikki fylgja teimum tilráðingum, ið hanga saman við at verða send í sóttarhald. Skulu vit avmarka coronasmittuna í Føroyum, er avgerandi, at fólk taka allar tilráðingar í størsta álvara.

Tað sigur Lars Fodgaard Møller, landslækni. Kaj Leo Holm Johannesen, landsstýrismaður í heilsumálum, heitir staðiliga á øll um at fylgja tilráðingunum frá heilsumyndugleikunum:

– Tað verða brúktir stórir stavir – bæði í Føroyum og kring allan heim um, at vit mugu ansa eftir hvørjum øðrum og taka neyðug atlit. Tað er týdningarmikið, at vit øll gera okkara og standa saman, so at vit tryggja, at so fá sum gjørligt verða smittað, sigur landsstýrismaðurin í heilsumálum.