Ógreitt um landskassin rindar fyri brimskaða

Enn er ov tíðliga at siga, um landskassin fer at bera part av útreiðslunum at umvæla grótkøst, sum fóru í ódnarveðrinum herfyri.

Tað sigur Jørgen Niclasen, landsstýrismaður, í svari til Sirið Stenberg, løgtingskvinnu, sum hevur spurt um málið.

Samband hevur verið millum Fíggjarmálaráðið og Kommunufelagið um viðurskifitni, har m.a. møguleikin við einum vanlukkugrunni varð umrøddur.

Sama hvat loysnin verður, er greitt, at fleiri spurningur mugu viðgerast í sambandi, og tí er ov tíðliga at gera nakra endaliga niðurstøðu, sigur Jørgen Niclasen.

Landskassin hevur fyrr borið part av útreiðslunum at umvæla grótkøst, sum hava fingið skaða.

Í sambandi við skaðarnar, sum vóru í Skálavík og Hvalba í 2008, læt landskassin ávikavist 400.000 og 900.000 kr. Tað svaraði til umleið ein tíggjundapart av tí, sum umvælingin kostaði.