Allar gudstænastur avlýstar til og við 10. mai

Fólkakirkjan fylgir tilmælunum frá landsins myndugleikum, og tí eru allar gudstænasturnar avlýstar fram til og við 10. mai 2020.

Fólk kunnu venda sær til sóknarprestin við fyrispurningi um dóp og vígslu. Er talan um bráðneyðugar umstøður, eru dópur og vígsla eyðvitað ein møguleiki, skrivar folkakirkjan.fo.

Fólk kunnu altíð ringja ella skriva til sóknarprestin, bæði, tá ið talan er um vanligar spurningar, sálarneyð ella aðrar átrokandi umstøður.

Andlát og jarðarferð eru viðkvæmt og sárt øki, ið eigur at handfarast hóvliga og við størstu virðing. Tey avvarðandi eru vælkomin at venda sær til sóknarprestin um, hvussu jarðarferðin á virðiligan hátt í stillum kann fara fram í kirkjuni, skrivar heimasíðan hjá Fólkakirkjuni.

Tiltøkini verða endurskoðað hálvan mei.