Vilja hava føroyingar at gera kanningar

Hóast til ber at kanna 600 fólk um dagin í Føroyum fyri koronu og verri enn so nógv verða kannað, fara Føroyar ikki at kanna royndir úr øðrum londum her í Føroyum.

Tað sigur Kaj Leo Holm Johannesen, landsstýrismaður, sum hevur svarað spurningum frá Kristinu Háfoss, løgtingskvinnu, um COVID-19.

Kristina Háfoss spurdi millum annað, um landsstýrismaðurin ætlar at bjóða grannatjóðum at senda koronukanningar til Føroya at verða greinaðar.

Hava fingið fyrispurning úr Hebridunum

Kaj Leo Holm Johannesen svarar, at Heilsufrøðiliga starvsstovan hevur fingið fyrispurning úr Suðuroyggjum, Hebridunum.

Heilsufrøðiliga starvsstovan sigur, at tað er ikki nøkur skilagóð loysn at greina kanningar úr Hebridunum í Føroyum.

Tað gongur ov long tíð, til úrslitið er klárt. Men í staðin kunnu føroyingar hjálpa teimum í Hebridunum við at seta upp ein kanningarhátt.