Horvin seglbátur funnin í øllum góðum

Shetland Coast Guard fann í nátt seglbátin Camalui, sum var á veg úr Haugesund í Noregi til Hetlands, haðani hann so skuldi til Føroya.

Ein maður, ein føroyingur, er umborð. Bátur og maður vórðu funnir í øllum góðum. Teir eru nú á veg til Hetlands. Camalui skuldi koma til Hetlands fríggjadagin, men kom ikki. Samband fekst ikki við bátin, og í gjár varð farið at leita.

Ringt veður og tung alda millum Noregs og Hetlands gjørdi, at Camalui rak aftur móti Noregi. Camalui er skrásettur í Vejle í Danmark.