Havnin tók FM við stórsigri á Sandavági

Havnar Telvingarfelag tryggjaði sær føroyameistaraheitið við stórsigri á verandi meistarunum úr Sandavági. Dysturin endaði 3½ - ½.

HT var kroyst undan síðsta umfari og skuldi vinna minst 3-1, um tað skuldi eydnast at gerast meistari. 

14 ára gamal í høvuðsleikluti

Bert 14 ára gamli Luitjen Akselsson Apol úr HT møtti roynda Torkili Nielsen hjá vágamonnum á 4. borði, og evnaríki unglingin sveik ikki álitið.  

Hann vann sannførandi, og tað gjørdi Olaf Berg eisini móti Silasi Thorsteinsson á triðja borði. Helgi Dam Ziska fekk remis móti Høgna Egilstoft Nielsen á 1. borði, og Martin Poulsen avgjørdi, tá hann koppaði Rógva Egilstoft Nielsen á 2. borði.