Myndir: Fimleikahøllin í Finsen verður til atelier

"Á leikvøllum funnust í forðum.."

Tíðin, tá skúlabørnini marsjeraðu syngjandi í báðum fimleikahøllunum í Kommunuskúlanum í Havn, er farin.

Meðan nýtt lív er blást í gomlu skúlastovurnar, hava báðar fimleikahallirnar í Finsen ligið órøktar í fleiri ár.

Men í næsta mánað flyta myndlistafólkini inn í ovaru høllina, sum er sett í stand; men kortini varðveitt í uppruna sniði.

Hoyr samrøðu við Boga Andreasen, leiðara í Reinsarínum, sum fær ábyrgdina av fimleikahøllini, sum verður til atelier.

Gomlu kurvarnar til kurvabólt sleppa at vera hangandi. Eisini málaðu málini hava fingið frið.

Antin hevur onkur næmingar sparka óvanliga hart, ella hevur kommunan tikið eitt petti av vegginum fyri at kanna, um blámusoppur goymir seg aftanfyri.

Trappurnar ímillum báðar hallirnar fáa frið. Tær knirka øgiligt.

Klivar verða settir við hvør sítt vindeyga báðum megin við. Úsýnið er framúr.

Hetta tons-tunga vaskið sleppur at vera verandi. Fyrr varð tað nýtt til at vaska bóltar; nú skulu penslar vaskast.

Onkrastaðni er gólvið so illa farið, at tað má leggjast av nýggjum.