Finna pengar til standmynd av Andreu Árting

Arbeitt verður framvegis við at finna pengar til eina standmynd av Andreu Árting í Havn.

Gunvør Balle, forkvinna í Mentamálanevndini hjá Tórshavnar býráði, kom við uppskotinum síðst í november í 2018.

Higartil hevur býráðið latið 650.000 kr, til endamálið.

Onnur hava eisini játtað at stuðla verkætlanini, - higartil tilsamans 110.000 krónur.

Tilmæli um Steinatún

Tórshavnar listaráð mælir til, at standmyndin verður í Steintúni.

Ráðið mælir til at byggja á nøkur fá krøv, millum annað boðskapin um Andreu Árting, sum eru kvinnujavnrættindi, sosialt rættvísi, áræði, áhaldni og sterk kvinnufyrimynd. Verkið skal kennast fólksligt, ikki elitert, forvitnisligt og sjónligt í býarmyndini. 

Andrea Árting var forkvinna í Havnar arbeiðskvinnufelag í 40 ár.