Sleppa at hava opið sum vant

Kunngerðin hjá Helga Abrahamsen, landsstýrismanni, sigur, at skeinkistøð skulu lata aftur í seinasta lagi klokkan 23, fer úr gildi á midnátt.

Landsstýrismaðurin ætlar sær ikki fyribils at lýsa nýggja kunngerð.

Síðan 7. august hava skeinkistøðini í Føroyum verið noydd at lata aftur í seinasta lagi klokkan 23. Tað varð staðfest við lóg.

Skeinkistøðini kunnu nú hava opið sum vant, men í býarlívinum í Havn eru tey á einum máli um at fara aftur til avtaluna, sum varð gjørd millum skeinkistøðini í vár.

Tað vil siga, at tey fara at hava opið til í seinasta lagi klokkan tvey um náttina um vikuskiftið.