Navalnyj komin fyri seg aftur

Russiski andstøðupolitikarin, Aleksej Navalnyj, er um at koma fyri seg aftur, eftir at hann varð eitraður.

Hann sigur seg ikki vera í iva um, at tað var russiski forsetin, Vladimir Putin, sum skipaði fyri, at hann varð eitraður.

Tað sigur hann við týska blaðið, Der Spiegel.

Til Týsklands

Navalnyj gjørdist sjúkur, tá hann var á vitjan í Sibir í august, og seinni varð hann flogin til Týsklands og lagdur inn á sjúkrahús har.

Kanningar, sum eru gjørdar av Navalnyj á týska sjúkrahúsinum, vísa, at hann varð eitraður við evninum, Novisjok. Royndirnar eru kannaðar í fleiri londum, millum annað í Fraklandi og Svøríki, umframt í Týsklandi.

– Eg eri vísur í, at Vladimir Putin, forseti, stóð fyri ætlanini at gera av við meg. Eg komi ikki til nakra aðra niðurstøðu, sigur Navalnyj við Der Spiegel.