Eingin landbúnaðarpolitikkur enn

Tað verður enn ein løta, til ein landbúnaðarpolitikkur er gjørdur fyri Føroyar, sigur Umhvørvis- og vinnumálaráðið.

Løgtingið bað annars í fjør landsstýrið orða og fyrireika ein landbúnaðarpolitik við ítøkiligum og realistiskum málum.

Tá seinasta samgonga var, komu tríggir arbeiðsbólkar við tilmælum um landbúnað í Føroyum.

Viðgera tilfarið nærri

Umhvørvis- og Vinnumálaráðið sigur, at grundarlagið at orða ein landbúnaðarpolitikk er gott.

Neyðugt er tó at viðgera alt tilfarið neyvari, áðrenn farast kann undir at gera eina ítøkiliga menningarætlan um føroyskan landbúnað. 

Henda viðgerð verður kortini ikki liðug soleiðis, at til ber at fara undir at seta í verk eina heildarmenningarætlan fyri landbúnaðin í Føroyum í 2021, hevur Fíggjarnevndin fingið at vita frá Umhvørvis- og vinnumálaráðnum.