Landslæknin: Eingin korona í Grønlandi

- Grønland er í eini serstøðu, tí tað síðsta smittaða fólkið í Kangerlussuaq nú er frískt aftur. Okkum vitandi er Grønland tí koronufrítt, segði Henrik L. Hansen, landslækni í Grønlandi, á tíðindafundi í Nuuk í gjár.

Men hóast tey ikki vita um nakran smittaðan í Grønlandi í løtuni, eru tó fleiri avmarkingar galdandi í landinum. 

Millum annað skalt tú í sóttarhald í fimm dagar, tá ið tú kemur til Grønlands. Ikki fyrr enn tú hevur eina negativa koronukanning fimta dagin, kanst tú fara til arbeiðis aftur.

Um tú ikki vilt lata teg kanna aftur fimta dagin, skalt tú vera heima í 14 dagar, og ikki fara til arbeiðis, fyrr enn tú kennir teg frískan, skrivar grønlendska kringvarpið, KNR.

Mæla frá at fara uttanlands

Landsstýriskvinnan í heilsumálum, Anna Wangenheim, landslæknin, Henrik L. Hansen og politimeistarin, Bjørn Tegner, mæltu á tíðindafundinum í gjár grønlendingum frá at fara uttanlands í jólafrí.

Grønlendski landslæknin segði eisini, at Grønland fær fyrstu koppingarevnini longu millum jóla og nýggjárs. 

Talan er tó ikki um serliga nógv koppingarevni í fyrstu syftu.

Nú skal uppskot gerast, hvør skal koppsetast fyrst, og nær tað skal gerast, segði Henrik L. Hansen.