ES góðkennir koppingarevni fyri koronu

Evropeiski heilivágsstovnurin, EMA, mælir nú til at góðkenna koronukoppingarevnið frá fyritøkunum Pfizer og BionTech.

Tað boðar stovnurin frá í dag.

ES-nevndin skal eisini formliga góðkenna nýggja koppingarevnið.

Forkvinnan í ES-nevndini, Ursula von der Leyen, sigur, at ES-nevndin fer ikki at leggjast á boðini, og fer at taka støðu til góðkenningina longu í kvøld.

Góðkenningin merkir, at flestu londini í Evropa fara at koppseta fólk fyri koronu 3. jóladag sum ætlað.

Íslendingar fáa eisini koppingarevni

Von der Leyen hevur í dag eisini havt samband við íslendska forsætisráðharran, Katrina Jakobsdóttir

Ísland og ES hava avtalað, at Ísland eisini fær part av fyrstu koppingarevnunum, tá tey vera góðkend í ES, og von der Leyen vissaði íslendska forsætisráðharran um, at ES stendur við avtaluna, eftir at óvissa brádliga tók seg upp um málið herfyri.

Heilsumálaráðið segði í síðstu viku, at Føroyar fáa góðar 4.700 skamtar av koppingarevninum í fyrstu atløgu, og at tey fyrstu verða koppsett millum jóla og nýggjárs.