Brexit-handilsavtala kanska klár í dag

Útlendskir miðlar skrivar, at Bretland hevur gjørt handilssemjur við fleiri lond, sum koma í gildi, tá Bretland endaliga fer úr ES.  Millum londini eru Mexico og Japan. Harafturat er Bretland í samráðingum við fleiri onnur lond so sum USA og Avstralia.

Kemur eingin semja í lag við ES, verður stórur tollur lagdur á vørur í handilin millum londini frá fyrsta januar. Sum skilst, fer Bretland úr evropiska dómstólinum, og partarnir eru samdir um eina aðra skipan, har ósemjurnar millum partarnar kunnu loysast uttanfyri ES lóggávu.

Nýggj fiskiveiðiavtala skal gerast og næstu fimm árini skal Bretland fáa størri ræði á egnum sjóøki. Fleiri fiskivinnulond í ES hava stúrt fyri avleiðingini av Brexit, tí vandi er fyri, at tey missa rættin at fiska í bretskum sjóøki. Alt bendir tó á, at lond sum Spania, Portugal og Danmark framhaldandi sleppa at fiska í bretskum øki, men tó verður nøgdin skerd.

Bretskir miðlar vænta, at Boris Johnson fer at hava tíðindafund í dag, har hann fer at siga, at partarnar hava gjørt semju.