Bretska koronuslagið staðfest í Danmark

Danir hava nú fingið eina nýggja sjúku inn í landið, sigur Viggo Andersen, lektari i matematiskari epidemiologi við Roskilde Universitet við Ritzau.

Hann sipar til bretska slagið av koronuvirusinum, sum danskir granskarar meta, smittar sera illa. 86 fólk í Danmark høvdu í gjár fingið henda bretska variantin av koronavirus. 

Statens Serum Institut hevði tá bara greinað 11 prosent av teimum positivu royndunum. Tí verður væntað, at veruliga talið av smittaðum við bretska slagnum er umleið níggju ferðir hægri. Tað vil siga 774 fólk.

Nýggja koronuvirusið ikki staðfest í Føroyum enn

– Er ein smittaður við tí einu mutatiónini, er ein immunur fyri hinari mutatiónini. Men ov fá eru immun av øllum fólkinum, tí higartil eru bara 165.000 smittað av koronu í Danmark.

Nýggja mutatiónin verður kallað B117 og smittar 50 til 70 prosent verri enn tann higartil kenda mutatiónin av koronuvirusinum.

– Vit mugu gera alt, vit kunnu, fyri at steðga smittuni. Tað gera vit við at hava minni samband við onnur, sigur Viggo Andreasen.

– Vit fylgja gongdini neyvt, og vit kunnu ganga út frá, at vit eisini fáa hesa nýggju mutatiónina av COVID-19 til Føroya, segði Lars Fodgaard Møller, landslækni við in.fo í gjár.