Nógv er gjørt men enn er ikki komið á mál

Tað almenna ger nógv fyri at tryggja øllum eitt stað at búgva. Men enn er ikki komið á mál.

Tað ásannar Elsebeth Mercedis Gunnleygsdóttur, landsstýriskvinna, sum hevur svarað Heðini Mortensen, løgtingsmanni, sum spurdi, hvat landsstýrið ger fyri at útvega øllum bústað. 

500 bústaðir 

Landsstýriskvinnan sigur, at Bústaðir hava gjørt 343 leigustaðir, og hava í løtuni fígging og ítøkiligar verkætlanir til at koma upp á 500.  

Og Bústaðir sleppa harafturat at taka 450 mió. kr. í láni sambært uppskotinum um bústaðapakka, sum nú er í løgtinginum.

Endamálið  við  bústaðapakkanum er eisini at eggja privatum íleggjarum at seta pengar í bústaðamarknaðin, sigur Elsebeth Mercedis Gunnleygsdóttur.