Símun Eliasen skal venja felagsliðið

Fyrrverandi hjálparvenjarin hjá A-landsliðnum við kvinnum, Símun Eliasen, er nýggjur venjari hjá EB/Streymi/Skála. Tað boða feløgini frá mánakvøldið.

EB/Streymur/Skála endaði á aftasta plássi í Betrideildini í fjør, men fleiri av ungdómsliðunum hava staðið seg væl.

U18-genturnar hjá EB/Streymi/Skála vunnu greipuna, og U15-genturnar hjá Skála vunnu steypakappingina.

Hevur nógvar royndir

Símun Eliasen spældi í nógv ár í bestu mansdeildini og vann í 2007 steypakappingina við EB/Streymi.

Fuglfirðingurin hevur A-prógvið hjá UEFA, og hevur millum annað vant ÍF og 1. deild hjá HB.

– Vit ynskja Símuni bestu eydnu við komandi avbjóðingunum og gleða okkum til eitt sera spennandi kappingarár, skriva feløgini.