Einki minni enn ein kollvelting

Á middegi loysti Jørgen Niclasen, landsstýrismaður í samferðslumálum, fyrsta flagið til vegagerðina í sambandi við nýggju tunlarnar norður um Fjall.

Jørgen Niclasen segði í røðu síni, at við nýggju tunlunum verður økið eystan Múla av álvara flutt úr myrkrinum á víkiplássinum og út í ljósið.

Millum teirra, sum vóru hjástødd í Ánunum í dag, var Steffan Klein Poulsen, løgtingsmaður fyri Miðflokkin, sum býr í Hvannasundi.

Hann heldur, at tað, sum er hent í dag, er einki minni enn ein kollvelting.

Hóast løgtingið fyrr hevur samtykt at gera tunlar norður um Fjall, og einki spurdist burturúr, kennir Steffan Klein Poulsen seg tryggan við, at teir nú verða gjørdir, tí pengar eru játtaðir, og tað var eitt einmælt løgting, sum samtykti verklagslógina.

Hoyr innslag í útvarpstíðindunum, sum Frants Jensen gjørdi úr Ánunum.

Frá vinstru Jón Sigurdsson, stjóri í Articon, Sigurd L. Lamhauge, stjóri í Landsverki, og Jørgen Niclasen, landsstýrismaður í samferðslumálum. (Mynd: Bjarni Árting Rubeksen)

Steffan Klein Poulsen, løgtingsmaður, býr í Hvannasundi. Hann heldur, at nýggju tunlarnir norður um Fjall verða einki minni enn ein kollvelting.  (Mynd: Bjarni Árting Rubeksen)