Brenna tilfar frá koronukanningum

Biologiskt tilfar frá koronukanningunum verður burturbeint, so skjótt sum staðfest er, um kanningin er positiv ella negativ. Tað verður brent.

Tó vera potingarpinnar hjá teimum, sum eru smittað, goymdir í eina viku, tí teir skulu kannast fyri frábregdi, millum serliga smittandi bretska frábregdið. 

Neyvar mannagongdir eru

Kaj Leo Holm Johannesen, landsstýrismaður, hevur svarað Ruth Vang, løgtingskvinnu, sum spurdi um biologiska tilfarið frá korunukanningum.

Hon spurdi millum annað, um tilfarið verður brúkt til annað enn at staðfesta, um tey kannaðu hava koronu.

Tað verður tað ikki, svarar Kaj Leo Holm Johannesen. Sambært svarinum eru neyvar mannagongdir um, hvussu tilfarið verður burturbeint.