Øll skulu verða koppsett fyri tjóðardagin

Gongur sum ætlað, verða øll fólk í Grønlandi koppsett fyri tjóðardagin, 21. juni.

Tað sigur Henrik L. Hansen, landslækni, sum eisini var landslækni í Føroyum frá 2014-2017, við grønlendska blaðið, Sermitsiaq.

- Tað er ikki óhugsandi, at vit náa at koppseta øll eldri enn 16 ár hetta til tjóðardagin í summar, sigur Henrik L. Hansen.

Grønland fær koppingarevni við somu ferð sum Danmark, men ætlar at verða liðugt at koppseta øll tvær vikur fyrr enn Danmark.

Sambært grønlendska landslæknaembætinum eru tilsamans 44.000 fólk í Grønlandi, sum eru eldri enn 16 ár, og sum tískil skulu koppsetast.

Higartil eru 3.655 fólk í Grønlandi koppsett einaferð, og 1.187 fólk hava eisini fingið tað seinna prikið.