Føroyar fáa ikki fullgildan limaskap

Enn einaferð hevur danska stjórnin staðfest, at bæði grundlógin og Helsingfors-sáttmálin forða fyri, at Føroyar fáa fullgildan limaskap í Norðurlandaráðnum.

Flemming Møller Mortensen, danski ráðharrin í norðurlandamálum, hevur svarað spurningi frá Edmundi Joensen, fólkatingsmanni, um føroyska limaskapin í Norðurlandaráðnum.

Tað einasta, ráðharrin kann lova, er at styrka lutin hjá Føroyum í Norðurlandaráðnum.

Men tað verður innan fyri karmarnar, sum grundlógin og Helsingfors-sáttmálin seta.

Sjálvstýrandi øki síðani 1970

Helsingfors-sáttmálin er samstarvssáttmálin, sum Danmark, Finnland, Ísland, Noreg og Svøríki gjørdu í 1962.

Føroyar hava síðani 1970 verið limur í Norðurlandaráðnum, men sum sjálvstýrandi øki.  

Løgtingið hevur oftari enn einaferð samtykt, at Føroyar eiga at søkja um fullgildan limaskap í Norðurlandaráðnum.