Verður latin sum eginkvota

Toskurin á Flemish Cap verður latin sum eginkvotur í ár.

Tað sigur Fiskimálaráðið í kunngerð, sum kom í síðstu viku.

Toskakvotan á Flemish Cap er ikki stór í ár, hon er 335 tons.

Línuskip sleppa at fiska toskin.

Søguligur fiskiskapur á Flemish Cap telur 75 prosent, tá kvota verður latin, og rætturin til fiskiloyvi telur 25 prosent.

Kann avreiðast uttanlands við treytum

Framvegis er galdandi, at allur toskurin skal avreiðast um bryggjukant í Føroyum. Avreiðast kann tó uttanlands, men tá er treytin, at fiskurin verður fluttur óvirkaður til Føroya og seldur fyrstu ferð í Føroyum.

Vørn skal góðkenna innvigingarskipanina, sum verður brúkt, tá avreitt verður uttanlands.

Eisini fiskiskapurin eftir toski, svartkalva og brosmu í grønlendskum sjógvi verður skipaður við eginkvotum.

Somu reglur eru galdandi um avreiðingar, sum eru um toskin á Flemish Cap.