Útisetar og útlendingar kunnu koppsetast í Føroyum

Talan er um útisetar og útlendingar, sum uppihalda sær í Føroyum í minsta lagi 30 dagar. Hesi kunnu fáa fyrru koppseting, tá ið tey hava verið í Føroyum í 14 dagar. Tilboðið er tó ikki galdandi, um mett verður, at einasta endamálið við uppihaldinum er koppseting.

Útisetar og útlendingar, sum hava føroyskt p-tal, kunnu bóka tíð á bókingarskipanini á heimasíðuni corona.fo. Fólk, sum ikki hava føroyskt p-tal, kunnu ringja til Landssjúkrahúsið og fáa nærri at vita, skrivar heimasíðan hjá Heilsumálaráðnum.

Føroyingar, ið eru undir útbúgving uttanlands, eru tó undantiknir kravinum um uppihald í Føroyum í 14 dagar.