Hov hevur størsta vøksturin í prosentum

Í prosentum er størsti vøksturin í fólkatalinum frá mai í fjør til mai í ár í Hovs kommunu.

Har er vøksturin 6,2 prosent. Tað eru seks fólk, og fólkatalið í kommununi fór upp um 100.

Næst kemur Skopun. Fólkavøksturin har er 4,3 prosent, 19 fólk.

Síðani koma Nes kommuna, Sjóvar kommuna og Eysturkommuna.Í Nes kommunu var vøksturin 3,7 prosent, 50 fólk, í Sjóvar kommunu komu 3,3 prosent, 36 fólk, afturat og í Eysturkommunu var vøksturin 3,2 prosent, 70 fólk.

Minkaði í níggju kommunum

Í níggju kommunum minkaði fólkatalið. Tað minkaði mest í Sumbiar kommunu, 3,1 prosent, 11 fólk.

Samanumtikið komu 863 fólk afturat í Føroyum frá mai í fjør til mai í ár. Vøksturin er 1,6 prosent.

1.mai í ár búðu 53.305 fólk í Føroyum.

1893 fleiri dreingir og menn enn gentur og kvinnur vóru 1.mai.