Fólk hava rætt at fáa Voxbotn-atgongumerkið endurgoldið

Fyriskipararnir av tónleikatiltakinum Voxbotn skrivaðu á facebook í síðstu viku, at fólk høvdu skrivað til teirra um møguleikan at fáa endurrindað atgongumerkið fyri Voxbotn 2020.

Voxbotn-fyriskipararnir søgdu seg ikki kunna viðgera hetta enn, tí tað framvegis er ógreitt, nær ein hjálparpakki kemur frá myndugleikunum.

Atgongumerkið skal endurgjaldast

Men lógin er púra greið, sigur brúkaraumboðið, Rannvá Ragnarsdóttir. 

"Verður eitt tiltak útsett ella avlýst, hevur brúkarin rætt til at fáa atgongumerkið endurgoldið."

Rúni Djurhuus, sum er ein av fyriskiparunum av Voxbotn tiltakinum, sigur við útvarpið, at tey framvegis bíða eftir boðum frá myndugleikunum. Og tí fáa teir onki gjørt í løtuni.

Rúni Djurhuus sigur seg vóna at kunna geva nærri boð skjótt.