Helena Kannuberg forkvinna í Málráðnum

Nýggja forkvinnan í Málráðnum eitur Helena Kannuberg, og hon er vald eftir tilmæli frá Føroyamáli.

Randi Kúrberg er næstforkvinna. Nám hevur tilmælt hana.

Hini eru Eyðun á Borg og Meifríð Weihe Hansen, sum landsstýrismaðurin í mentamálum tilmælti, Johan Blábjørg, sum Deyvafelagið og felagið Hoyr tilmælti, Rakul Skaale Andreasen, sum Fróðskaparsetrið tilmælti, Theodor E. Olsen, sum  Javnstøðunevndin tilmælti, Elin Henriksen, sum Móðurmálslærarafelagið tilmælti, Heri J. Joensen, sum Navnanevndin tilmælti, Bergur Rasmussen, sum Rithøvundafelagið tilmælti og Lena Reinert, sum Staðarnavnanevndin tilmælti.

Bara Elin Henriksen heldur fram í Málráðnum, nú tað er valt fyri næstu fýra árini.

Hini tíggju, sum blivu vald í 2017, eru ikki afturvald. 

Landsstýrismaðurin tilnevndi forkvinnuna og næstforkvinnuna.

Málráðið skipar seg við eini starvsnevnd, sum hevur fimm limir.

Skal røkja, menna og verja

Endamálið hjá Málráðnum er at røkja, menna og verja føroyska málið, eisini teknmálið.

Málráðið skal vegleiða, ráðgeva og gera niðurstøður í málspurningum og áseta føroyska stavseting.

Málráðið gevur landsstovnum og almenninginum vegleiðing, ráð og upplýsing um føroyskt í talu og skrift. 

Almennir myndugleikar eiga í størstan møguligan mun at fylgja niðurstøðunum hjá Málráðnum.

Til ber eisini hjá stovnum og einstaklingum at venda sær til Málráðið við spurningum.